پېښور 29 اګست (اے پي پي) د خېبر پښتونخوا وزيراعلٰي علي امين خان ګنډا پور سره د ملګرو ملتونو پلاوي د جمعې په ورځ په اسلام آباد كښې ليدلې۔ د وزيراعليٰ هاٶس وياند له مخې پلاوي علي امين ګنډا پور سره په صوبه كښې د اوسني سېلاب څخه په ځاني او مالي زيان د غمرازۍ او همدردۍ څرګندونه كړې۔ وزيراعليٰ پلاوي ته ووئيل چې د صوبې اته ضلعې اوسني سېلابونو او بارانونو سختې ځپلې دي٬ په دې سېلابونو كښې د 400 نه زيات كسان مړه او د 240 نه زيات ژوبل شوي٬ 664 كورنه په بشپړه او 2431 خونې په جزوي ته ړنګې شوې دي٬ د دې نه علاوه سكولز٬ د صحت بنيادي مركزونه٬ روډز٬ انفراسټركچر او د څښلو اوبو نظام ته هم زيان رسېدلے دے٬ ده ووئيل چې صوبائي حكومت د حق رسېدليو كورنيو معاوضه د لس لكه روپو نه زياتولو سره شل لكه كړې ده دغسې د ژوبل شويو معاٶضه د 2.5 لكه روپو نه پنځه لكه روپۍ كړې شوې ده۔ ده ووئيل په بشپړه توګه د ړنګ شوې خونو معاوضه د څلورو لكو نه زياتولو سره لس لكه روپۍ كړې شوې ده او په جزوي توګه د ځپلې شوې خونو معاوضه د يو لك نه زياتولو سره درې لكه روپۍ شوې ده۔ ده ووئيل چې په وړومبي ځل د ړنګ شوې دكانونو مالكانو لپاره پنځه لكه روپۍ معاوضه مقرر شوه او په كومو دكانونو كښې چې د سېلاب اوبه داخلے شوے وے ھغوي لپاره يو لك روپۍ مقرر شوې دي٬ د دې نه علاوه صوبائي واكمنو فصلونو٬ باغونو او د څاروو زيانونو لپاره هم د معاوضې وركولو پرېكړه كړې ده۔ علي امين ګنډا پور ووئيل چې معاوضو وركولو لپاره ډيجيټل پېمنټ نظام رائج كړې شوے دے او تر اتوار ورځ به ټولې ادائېګۍ بشپړې شي۔ د پلاوي په غړو كښې پاكستان لپاره د يو اېن ريزيډنټ کوآرډينيټر محمد يحييٰ، يو اين ريزيډنټ کوآرډينيټر آفس مشر افکے بوټسمين او د يونائيټډ نيشنز آفس فار کوآرډينيشن آف هيومينيټيرين افيئرز مشر کارلوس ګيها شامل وو۔
