اسلام آباد 18مارچ(اے پي پي)د قامي اسمبلۍ سپيكر اسد قيصر وئېلي دي كشمير د پاكستان شه رګ دے٬ پاكستانے اولس د كشميري اولس دړد خپل دړد ګڼي٬ ګرده نړۍ په كشميري اولس د هندي ظلم او زياتي غندنه كوي٬ د هند فاشسټ نظريې او مودي سركار د كشمير پشمول په ټول هند كښې د اقليتونو ژوند اور سپور كړے۔ د دې خيالاتو څرګندونه ده د آزاد كشمير پخواني وزيراعظم او د آزاد كشمير د پاكستان تحريك انصاف صدر بېرسټر سلطان محمود چوهدري سره د ملاقات په مهال خپلو خبرو كښې وكړه۔ ملاقات كښې د هېواد په مجموعي سياسي٬ معاشي او امنيتي وضعه هم د خيالاتو څرګندونه وشوه۔ د قامي اسمبلۍ سپيكر ووئيل كشمير د پاكستان شه رګ دے۔ پاكستان به د كشميري اولس سياسي٬سفارتي او اخلاقي ملاتړ روان ساتي۔ ده ووئيل وزيراعظم عمران خان په عمومي اسمبلۍ كښې د كشمير مقدمه په ښه ډول وړاندې كړې٬د پاكستان موجوده حكومت په معاشي او اقتصادي بحرانونو قابو موندلو كښې كامياب شوے۔ اسد قيصر ووئيل د هېواد معاشي اشارې ښه پلو روانې دي۔ بېرسټر سلطان محمود چوهدري كشميري اولس لپاره د قامي اسمبلۍ سپيكر جذبه ستائيلو سره ووئيل هند د خپلو ناوړه چالونو د لارې د كشميري اولس د آزادۍ مضبوطه جذبه كمزورې كولې نه شي٬ كشمير د نيمې اوچې وېش يو نيمګړې ايجنډا ده٬ د منطقې امن دې مسئلې سره تړلے دے۔ سلطان محمود چوهدري ووئيل كشميريان د پاكستان تحريك انصاف سره ژور نظرياتي تعلق لري هغه زياته كړه چې هند له به دا تسليمول وي چې كشمير يوازې د كشميريانو دے
