د برتانيې حكومت په سفارتي ذريعه خبر كړے شوے چې مجرم نواز شريف عدالتونو ته مطلوب دے، كوربه هېواد دې هغه پاكستان ته اوسپاري. د اطلاعات او خپرونو وزير شبلي فراز

اسلام آباد 21 اكتوبر (اے پي پي) د اطلاعات او خپرونو وفاقي وزير سنېټر شبلي فراز وئيلي دي د برتانيې حكومت په سفارتي ذريعه خبر كړے شوے چې مجرم نواز شريف عدالتونو ته مطلوب دے، كوربه هېواد دې هغه پاكستان ته اوسپاري، په تېر وخت كښې د دې سياستمدارو د وروستې اډې په وجه د برتانيې او امريكې پشمول نورو هېوادونو سره د مجرمانو د تبادلې لوظنامې نه دي شوي ، د كراچې په پېښه د سرلښكر او د سندھ حكومت د انكوائري رپورټ په رامخې ته كېدونكو وړاندېزونو به د سندھ حكومت ذمه وار وي چې په هغې عمل وكړي، بلاول بهټو او مريم نواز د وراثتي سياست پېداوار دي، د احتساب عمل به په يو صورت هم نه اودرېږي، ډېر زر به ټول كرپشن كوونكي په زندان كښې پراته وي، دا هم كېدے شي چې د كراچې په پېښه كښې د سندھ حكومت خپل كردار وي، يوازې كرپشن بچ كولو لپاره ادارو سره د جنګ ماحول راجوړوي، د حقيقي اپوزيشن وجود هم نشته. د شورو په ورځ په پي آئي ډي كښې خبري كنفرنس ته د وېنا كولو په مهال د اطلاعات او خپرونو وفاقي وزير سنېټر شبلي فراز ووئيل معيشت پرله پسې بهترې پلو روان دے، زمونږ برآمدات مخ په زياتېدو دي، په هېواد كښې د كاروبا صورتحال معمول ته راروان دے. هره ورځ د بهرنيو هېوادونو څخه ترسيلات زر كښې اضافه كېږي. ده ووئيل د معيشت شمېرې مثبتې اشارې لري.ده ووئيل وزيراعظم د هېواد ښېګړې لپاره كار كوي خو چې كله بل پلو اپوزيشن ته وګورو نو په يو سټېج ناستې سره راته بنارسي ټګان راياد شي. دې دوه مخيزو هېواد لوټ كړے او خپل دولت ئې بهر منتقل كړے.ده ووئېل اپوزيشن د شر او وزيراعظم د خېر په بيانيه چلېږي. دا خلق غواړي چې اولس د دوي كرپشن كړے څېرې هېرې كړي، دوي هېواد لوټ كړے، څلوېښت كاله په هېواد كښې د بنارسي ټګانو حكومت ؤ . ده ووئېل دا خلق د لېنډكروزر او د ايئر كنډېشن د كوټو نه د غريب اولس خبره كوي. وفاقي وزير ووئيل قوم به د دوي څخه په هېواد كښې د ناامنې او اړي ګړي بدل اخلي. ده ووئيل اپوزيشن هڅه كوي چې ادارې په خپلو كښې په جنګ كړي، اپوزيشن د دښمن په اېجنډا كار كوي. د هند په خبرونو كښې او چېنلو باندې د دوي عكسونه ښودلے كېږي. اپوزيشن ته معلومه نه ده چې دوي كوم اور سره لوبې كوي. ده ووئيل وزيراعظم د نن نه دوه كاله وړاندې وئيلي وو چې ټول غله به يو ځائ كېږي، د اومني ګروپ څوك ځواب نه وركوي. ده ووئيل پاكستان تحريك انصاف خو په اپوزيشن كښې د دوي مقابله كړې وه ، اوس حكومت دے، د دوي سره مقابله په ښه ډول كېدې شي. ده ووئيل د شهباز شريف د ملازمانو د اكاٶنټ نه اربونه روپې راوځي. ده ووئيل تاسو د بهر نه د بزدلو غوندې تقريرونه كوئ خو هېواد ته نه راځې. ده ووئيل مريم نواز خپل ځان بېنظير بهټو ګڼي، بېنظير بهټو يوه لوستې مېرمن وه، په ګران لباس او پېزار اچولو څوك بېنظير نه شي جوړېدې. د اطلاعات وزير ووئيل د ن ليګ په حكومت كښې خو د هغه وخت د وزيراعظم ائير لائن په ګټه روان ؤ خو قومي ائير لائن پرله پسې خسارې سره مخ ؤ. ده ووئيل ځينې خلقو سندھ خپل ذاتي جاګير ګڼلے، په حقيقت كښې داسې نه ده ۔ده ووئېل د يوې قومي سطحې ګوند د يو كلي ګوند په توګه اوس كار كوي. د كراچې او سندھ حال بدتره دے او په پوليس كښې كريمنل كسان بهرتي كړې شوي. دې خلقو د جمهوريت په خېټه چاړه منډلې. ده ووئيل بلاٶل بهټو وائې چې اولس دې زما ملګرتيا وكړي، كومو خلقو ته چې تاسو غاړې وركوې، دوي ستاسو مشرانو ته بد وئيلي دي.