اسلام آباد 13 اکتوبر (اے پي پي) د كشمير په اړه د وزيراعظم خاص استازو شاهنواز رانجها او محمد پروېز ملك د تركيې وزيراعظم بن علي يلدرم سره ملاقات وكړو او هغه ئې په مقبوضه كشمير كښې د هندي ځواكونو لخوا د بشري حقونو د سرغړونو٬ په بې ګناه كشميريانو د ظلمونو او د مقبوضه كشمير د اوسني صورتحال نه خبر كړو۔ دوي ترك وزيراعظم ته ووئيل چې د برهان واني د شهادت نه پس كشميريان د هند د قبضې په ضد پاڅېدلي دي۔ هند په مقبوضه كشمير كښې د بشري حقونو څخه سرغړونې كوي۔ ده ووئيل چې په دې وروستيو كښې 110 بې ګناه كشميريان شهيدان كړې شوي دي۔ د احتجاج په مهال 12 زره كشميريان ژوبل شوي دي۔ ماشومان او مېرمنې هم محفوظ نه دي۔ د تركيې وزيراعظم د پاكستاني پلاوي هركلې وكړو او وې وئيل چې پاكستان او تركيه نزدې رشتې لري٬ دواړو هېوادونو د يو بل پوخ ملاتړ كړے۔ ده په مقبوضه كشمير كښې د بشري حقونو په صورتحال اندېښنه وښودله او د هندي ظلم ئې سخته غندنه وكړه۔ ده ووئيل چې تركيه به په او آئي سي كښې هم په دې لړ كښې غږ پورته كوي۔ ده باور وركړو چې تركيه به د كشمير په مسئله د پاكستان بشپړ ملاتړ كوي۔ دا پلاوې د وزيراعظم محمد نواز شريف په هدايت تركيې ته تللې۔
